Ако сте читале барем малку повеќе за храната, тогаш сигурно знаете што значи зборот нутриенти. Тоа се важни делови од храната кои се добри за нас и нашето здравје. Но, дали сте знаеле дека постојат и антинутриенти? И дали сте знаеле дека тие исто така можат да делуваат на нашето здравје и физичката активност?

Некои зеленчуци имаат големи количини на антинутриенти, или материи кои ја прават храната помалку привлечна. Но, пред околу милион години, луѓето научиле еден мал трик со кој можат да се уништат овие антинутриенти, а тоа е оганот.

Да, варењето е одличен начин да се намали дејството на антинутриентите. За да го извлечете најдоброто од вашата исхрана, гответе се што може да содржи антинутриенти. Запомнете, овошјето содржи многу малку вакви материи, и тоа главно во семките, па затоа не мора да се вари.

Што се антинутриентите и што прават?

Антинутриентите се природни или синтетички соединенија кои се мешаат со апсорпцијата на нутриентите. Некои од најпознатите антинутриенти се фитати, флавоноиди и лектини. Најмногу ги има во спанаќот, брокулата, гравот и пченицата, но ги има и во чај, кафе, вино. Сите овие антинутриенти ја инхибираат апсорпцијата на минерали од храната и ги инхибираат ензимите за варење, односно предизвикуваат надуеност и гасови.

Дали антинутриентите се лоши?

Зависи. Ако го избегнувате црвеното месо и јадете сиров зеленчук, овие антинутиенти предизвикуваат или го зголемуваат недостатокот на минерали. Исто така, ако редовно се занимавате со физичка активност, потребата за минерали на организмот е зголемена, па антинутриентите би требало да се избегнуваат. Меѓутоа, ако јадете балансирана храна, со месо и различен сварен или обарен заленчук, тогаш не би требало да се грижите за дејството на антинутриентите.

Како да се намали ефектот на антинутриентите?

Спанаќ – бланширајте го спанаќот. Ставете вода да зоврие, а потоа додадете сиров спанаќ и оставете го во водата 3 минути. Потоа веднаш исцедете го. Друг добар начин за приготвување на спанаќот е запржувањето. Ставете малку путер, и ако сакате кромид, во тавче на висока температура (но не максимум). Додадете го сировиот спанаќ и пржете 3 минути. Можете врз приготвениот спанаќ да исцедите малку лимон, што не само што ќе го подобри вкусот, туку и ќе додаде витамин Ц кој ја зголемува апсорпцијата на минералите.

Брокула – Ставете сад до половина наполнет со вода да се вари. Завиткајте ја сировата брокула во алуминиумска фолија и спуштете ја во водата. Таа нема да потоне, ама внимавајте краевите на фолијата да се издигнати, за да нема контакт со водата (згоден начин за варење на пареа). Оставете ја брокулата 10 минути, а потоа можете да ја послужите. Друг начин е да ставите малку путер и да ја пржите брокулата на умерено висока температура, но не подолго од  5 минути.