Колку и да се чини дека воспалнителниот процес во организмот е изворот на проблеми, токму овој процес е заслужен за правилно функционирање на организмот. Местото на воспаление практично е место на кое организмот се обидува да се одбрани од повреди и/или надворешни тела, и тоа на тој начин што доведува повеќе крв со зголемено присуство на макрофаги, хистамин и други имунолошки материи.

Обновувањето на ткивата и одстранување на мртвите ќелии се основните процеси кои го придружуваат секое воспаление. Но, искуството кажува дека овде се работи за меч со две оштрици. Имено, освен физичките промени во ткивото, воспаленијата често предизвикуваат послаба или појака дисфункција во организмот, а кога таа ќе стане хронична, воспалението се претвора во сериозен здравствен проблем.

Некои истражувања дури ги поврзуваат континуираните воспалителни процеси во одредени ткива со развојот на тумор-ќелии, па отстранувањето на хроничните воспаленија се смета и за некој вид на превенција од рак. Во секој случај, одереден  степен на воспалителна имунолошка реакција е скоро секогаш присутен во организмот, без разлика на тоа дали ние сме свесни за тоа или не.

За ваквата состојба, според многу научници, значително придонесува и модерниот начин на живот кој е најчесто комбинација од стрес, лоша исхрана и премалку движење. Постојат и индикации дека вишокот на масти во организмот исто така придонесуваат за појава на хроничните воспаленија, кои кај луѓето со поголема телесна тежина се појавуваат почесто отколку кај оние со нормална тежина.

Рибата е незаменлива

Мастите ја имаат едната од главните улоги во правилното функционирање на имунолошкиот систем. Есенцијални се омега -3 и -6 масните киселини, а нивниот заемен однос е деликатен систем на кој треба да се обрати посебно внимание. Омега-6 масните киселини служат за поттикнување на имунолошкиот систем да одговори на воспалителниот процес, додека омега-3 киселините имаат задача да го намалат или смират тој процес.

Двата вида на масни киселини мора да бидат неизоставен дел од исхраната на секој човек – но, она што е уште поважно е нивниот однос. Факт е дека храната која денес секојдневно ја конзумираме се базира на процесирана храна која содржи растителни масла од пченка и сончоглед, транс-маснотии и животински масти, а сите овие делуваат про-воспалително. Поради ова, токму правилниот избор на масти во нашата исхрана е основа на секоја анти-воспалителна “диета“. Маслиновот масло, путер наместо маргарин, сончогледово масло во умерени количини, би требало да направат голема разлика.

Најдобрите извори на онега-3 масните киселини се дивечот, месо одгледувано на природен начин (стока која пасе трева), семки од лен и риба која живее во ладна вода. Практично, токму рибата е незаменлив извор на омега-3 масни киселини. Но, кога сме веќе кај рибата, мора да се земе во предвид прашањето на тешките метали, особено на живата, бидејќи морските риби се повеќе и повеќе стануваат нивни носители. Поради ова, експертите препорачуваат конзумирање на помали риби, кои се наоѓаат подолу во ланецот на исхрана, па со тоа се и помалку подложни на акумулација на отрови. Затоа, вклучување на сардина, на пример, во исхраната е повеќе од препорачливо, но најмногу до два пати неделно.

Свежиот зеленчук и овошје се неопходни

Покрај рибата, во храна која делува поволно при воспалителни процеси се наоѓаат и оревите, како и мелени семки од лен. ат Препорачливо е овие продукти да се чуваат во фрижидер бидејќи содржат големи количини на масти кои лесно се расипуваат (исчистените ореви можете да ги спакувате во кесичка и да ги замрзнете).

Овошјето и зеленчукот се секако високо на листата на пожелни намирници. Јадете ги свежи и непреработени што е можно почесто и што е можно повеќе. Сите вакви намирници се преполни и со антиоксиданти, покрај останатите добри работи. Токму овие антиоксиданти го помагаат здравото функционирање на имунолошкиот систем преку неутрализирање на слободните радикали, а со тоа ја минимизираат појавата на воспалителни процеси. Нема да згрешите ако при изборот на овошје и зеленчук се водите по бојата. Што повеќе шаренило, толку повеќе различни пигменти, па толку поголемо богатство од различни витамини, минерали и антиоксидациски елементи.

Постојат и неколку зачини кои имаат значително анти-воспалително делување. Такви се, на пример, ѓумбирот, куркумата и чили пиперчињата. Ако ги немате, задолжително набавете ги овие зачини и користете ги често во исхраната, но во умерени количини. Сепак, она што во нашата кујна прави чуда е лукчето, па користете го постојано. На дневна база помага и храна богата со цинк: семки од сончоглед, јаткасто овошје.

6 стратегии за дефанзивна исхрана 

  • Масна морска риба до два пати неделно
  • Маслиново масло и умерено користење на сончогледово масло (никако масло од пченка или палмино масло)
  • Јаткасто овошје (ореви, бадеми, лешници…) и семки (од сончоглед, од лен)
  • Шарено, свежо овошје и зеленчук секој ден
  • Црно вино, до 0,5 л дневно
  • Зачини: лукче, ѓумбир, куркума, чили